ငွေရရင် ပျော်နေတာသည် ကိလေသာရူး ဖြစ်နေတာဟုလည်း ဆိုသည်။ တဏှာခိုင်းတာ လုပ်ပြီး ဉာဏ်ခိုင်းသော သူတော်ကောင်း အလုပ် မလုပ်ဘဲနေလျှင် မျက်စိလည်နေခြင်း ဖြစ်ပုံကို ပြသည်။ တဏှာအလိမ်မိနေတာ ဖြစ်ပုံကို ပြသည်။ ရောဂါ ရောက်သောအခါ မသေရအောင် ဆရာကောင်း ဆေးကောင်းရှာပြီး ငွေကုန်ခံ ကုသသည်။ အလှူပေးသောအခါ မဏ္ဍပ်ကြီးထိုးပြီး လူချမ်းသာ နတ်ချမ်းသာ ဆုတောင်းပြီး သေဘေးကို ဆုတောင်းသည်ဟု ထောက်ပြသည်။ တဏှာ အလိမ်ခံရပုံ ဖြစ်သည်။ ကျန်းမာတော့ အသေရှာသည်။ မကျန်းမာမှ အသေလွတ်ရာ ရှာသည်ဟု ဆိုသည်။
ခန္ဓာကိုယ်ကြီးသည် ဒုက္ခခန္ဓာကြီး ဖြစ်သည်။ သူ့ကို ဖြစ်ပျက်မြင်အောင် ရှုရမည်။ ထိုခန္ဓာကို မလိုချင်အောင် မုန်းအောင် ကြည့်ရမည်။ ဉာဏ်မရှိခင်က ဒီခန္ဓာကို ငါ့ဟာဟု ပြောသည်။ ဆရာကောင်းနှင့် တွေ့ပြီး ဉာဏ်အမြင် ရသောအခါ ဤခန္ဓာ ဒုက္ခသစ္စာဟု သိသည်။ ဒုက္ခသစ္စာသည် သိမ်းပိုက်ရမည့် အရာမဟုတ် ပစ်ထားခဲ့ရမည့် အရာသာ ဖြစ်သည်။ ဒုက္ခသစ္စာကြီးကို ငါ ငါ့ဥစ္စာ ထင်နေခဲ့ကြသည်။ သာသနာတွင်းမှာ လူမဖြစ်သရွေ့ ဆရာကောင်း မတွေ့သရွေ့ အမြင်မှန် မရနိုင်။ ငါဆိုတာက ဒိဋ္ဌိ ငါ့ဥစ္စာဆိုတာက တဏှာ ဖြစ်သည်။ ဒီခန္ဓာကြီးကို တဏှာဒိဋ္ဌိနှင့် စွဲပြီးသေလျှင် တဏှာ ဥပါဒါန် ကံ ပဋိစ္စသမုပ္ပာဒ်အရ ဒိဋ္ဌိဦးစီးသော ကံဖြစ်၍ အပါယ် အကျိုးပေးသည်။ ငါက ဒိဋ္ဌုပါဒါန် ငါ့ဥစ္စာက ကာမုပါဒါန် ဖြစ်သည်။ ဥပါဒါန်နှင့် သေလျှင် ဥပါဒါနပစ္စယာ ဘဝ ဘဝပစ္စယာ ဇာတိ ဇရာ မရဏ သောကပရိဒေဝ ဒုက္ခ ဒေါမနဿ ဥပါယာသ ဖြစ်တော့သည်။ ခန္ဓာချည်တိုင်မှာ ခေါင်းစင်းပြီး သေရခြင်းဖြစ်သည်ဟု မိန့်ပါသည်။
ဤတွင် ဆရာတော်ကြီးက ခန္ဓာကိုချည်တိုင် တဏှာကကြိုး အဝိဇ္ဇာဒိဋ္ဌိက လည်ပတ်(ငါစွဲ) ပုထုဇဉ်၏ အဖြစ်ကို ပြသည်။ ဒိဋ္ဌိလည်ပတ်၍ ခန္ဓာချည်တိုင်မှာ တဏှာကြိုးဖြင့် ချည်နှောင်ထားခြင်း ခံနေရပုံကို သရုပ်ဖော်ပြသည်။ ဝိပဿနာ မလုပ်တဲ့ပုဂ္ဂိုလ် ငါ ငါ့ဥစ္စာစွဲ မပြုတ်တဲ့ ပုဂ္ဂိုလ်မှာ အပါယ်ပဲ ဖြစ်နေရသည်။ လွတ်ချငိလျှင် တဏှာကြိုးနှင့် ဒိဋ္ဌိလည်ပတ်ကို ပြတ်အောင် လုပ်ရမည်။
လည်ပတ်နှင့် ကြိုးပြတ်အောင် လုပ်မည်ဆိုလျှင် စိတ်ကိုဖြစ်စေ ဝေဒနာကိုဖြစ်စေ ဖြစ်ပျက် ဝိပဿနာ ရှုရမည်။ တဏှာကြိုးပြတ် ဒိဋ္ဌိလည်ပတ် ပြတ်လျှင် ပုထုဉ်ဘဝက လွတ်ပြီ။ အရိယာဘဝကို ရောက်ပြီ။ ဒါကြောင့် သတိပဋ္ဌာန်လေးပါး တစ်ပါးပါးကို ရှုရမည်ဟု ဆုံးမထားသည်။
~ မိုးကုတ်ဆရာတော် ~
No comments:
Post a Comment